Prezident meva-sabzavotchilik sohasi rivojiga toʻsqinlik qilayotgan omillarni belgilab berdi

Oʻzbekiston Respublikasi Prezidenti “Oʻzbekiston Respublikasida meva-sabzavotchilikni jadal rivojlantirishga doir qoʻshimcha chora-tadbirlar toʻgʻrisida”gi farmonni imzoladi.

Hujjatda qayd etilishicha, xorijiy meva-sabzavot mahsulotlari bozorlaridagi yuqori darajadagi raqobat agrotexnikaning hamda ishlab chiqarish va mahsulot etkazib berish jarayonlarini boshqarishning zamonaviy uslublarini jadal ravishda joriy etishni talab qilmoqda.

Biroq qator salbiy omillar mamlakat agrosanoat sohasi salohiyatidan samarali foydalanish va uni rivojlantirishga toʻsqinlik qilmoqda. Ular jumlasiga quyidagilar kiradi:

birinchidan, meva-sabzavot mahsuloti ishlab chiqaruvchilari va tayyorlovchilari oʻrtasida meva-sabzavot ekinlari bozorida xaridorgir ekinlar va ularning navlarini joylashtirish masalalarida oʻzaro hamkorlikning bozor mexanizmlaridan toʻliq foydalanmaslik;

ikkinchidan, tuzilgan shartnomalarni oʻz vaqtida, sifatli, toʻliq yoki mutlaqo bajarmaslik kabi harakatlarda namoyon boʻluvchi kichik qishloq xoʻjaligi tovar ishlab chiqaruvchilari tomonidan shartnoma intizomiga rioya qilish darajasining pastligi;

uchinchidan, qishloq xoʻjaligi mehnatini mexanizasiyalashtirish, zamonaviy intensiv, avvalo, suvni tejovchi texnologiyalarni joriy qilish, ularni saqlash va transportirovka qilish, qishloq xoʻjaligi mahsulotlari ishlab chiqaruvchilarining mustaqil ravishda tashqi bozorga chiqishi uchun moliya resurslarini jamgʻarish uchun qulay imkoniyatlarning yoʻqligi;

toʻrtinchidan, qishloq xoʻjaligi mahsuloti ishlab chiqaruvchilarining bozorlarda xaridorgir boʻlgan yuqori hosildorlikka ega va sifatli navlarning urugʻi, koʻchati bilan qoniqarli ravishda taʼminlanmaganligi;

beshinchidan, qishloq xoʻjaligi mahsuloti ishlab chiqaruvchilarining real ehtiyojlariga javob bermaydigan kadrlar tayyorlash tizimining past darajasi, jumladan, zamonaviy bilimlarga ega oʻrta va oliy boʻgʻinning yuqori malakali mutaxassislarini tayyorlash boʻyicha xalqaro hamkorlik yoʻlga qoʻyilmaganligi;

oltinchidan, logistika va transport infratuzilmasi rivojlanmaganligi hosilning bir qismi nobud boʻlishi, shuningdek, etishtirilgan mahsulotni arzon narxlarda sotish va natijada qishloq xoʻjaligi mahsuloti ishlab chiqaruvchilarining qoniqarsiz moliyaviy koʻrsatkichlariga sabab boʻlmoqda;

ettinchidan, turli ekinlar agrotexnologiyalarining dolzarb masalalari va ularni amaliyotga joriy etish boʻyicha chuqur ilmiy tadqiqotlarning yoʻqligi, ilmiy institutlar va qishloq xoʻjaligi mahsulotlari ishlab chiqaruvchilari oʻrtasidagi oʻzaro munosabatlarning past darajasi.

 

Manba: kun.uz sayti.

 268 marta ko‘rilgan,  2 marta bugun ko‘rildi

Fikr bildirish

Email manzilingiz chop etilmaydi. Majburiy bandlar * bilan belgilangan

Ushbu sayt spamga qarshi kurashda Akismet’dan foydalanadi. Qoldirgan izohlaringiz qanday qayta ishlanishi bilmoqchi boʻlsangiz, shu havola orqali sahifaga oʻting.