Tarvuzni qishga saqlash qiyinmi?

Tarvuzni saqlash uchun qulay harorat +3˚C, havoning nisbiy namligi 85% atrofida boʻlishi maqsadga muvofiq. Agar tarvuzlar +0˚C haroratda saqlansa, maʼlum muddatdan keyin bemaza boʻlib qoladi. Tarvuzlar tashish va saqlash davomida pishmaydi.

Tarvuzlarni maxsus xonalarda, ayvonlarda toʻr xaltalarga solib osib qoʻygan holda yoki maxsus stellajlarda yuqoriga qaratilgan holda 2-3 qator qilib, terib saqlash mumkin.

Tarvuz va qovun havo namligi va harorati mos boʻlgan xona yoki yertoʻlaga oʻxshash joyda saqlanadi. Bunday xonalarga kengligi 1,5 m dan boʻlgan 4-5 qavatli (50 sm masofada) stellajlar qoʻyiladi. Stellaj bilan devor oraligʻida yoʻlak qoldirish kerak. Ventilyatsiya sistemasi oʻrnatish, zarur boʻlganda isitish uchun moslangan boʻlishi lozim.

Poliz mahsulotlarining saqlashga yaroqliligi koʻp omillarga, xususan, etining strukturasi, kimyoviy tarkibi va shu kabilarga bogʻliq. Eti qalin, tarkibida pektin moddalari bor mahsulotlar yumshoq etligiga nisbatan uzoqroq turadi. Tarvuzni koʻpi bilan 3 oy saqlash mumkin.

Yengil qumloq tuproqlarda yetishtirilgan tarvuzning poʻchogʻi qalin boʻlib, bunday tarvuzlar uzoq saqlanadi va transportda tashishga yaroqli boʻladi.

Tarvuzning saqlashga yaroqli boʻlishiga sugʻorish ham taʼsir qiladi. Sugʻorilganda poʻsti yumshaydi. Shuning uchun tarvuzni uzib olishdan 2-3 hafta oldin suv berish toʻxtatiladi. Uzoq saqlash uchun tarvuzning kechki navlari olinadi. Tarvuz quyoshli kunlarda bandi bilan uziladi.

Tarvuzlar bir-biriga tekislanmagan holda tokchalardagi yumshoq toʻshamaga bir qator terilib, shuningdek, turli materiallardan qilingan sumkalarda yoki qamishdan toʻqilgan toʻrxaltalarga osib qoʻyiladi. Koʻpchilik polizchilar tarvuzni havo harorati +1,+3˚C, nisbiy namligi 80-85% boʻlgan joylarda saqlashni tavsiya qilishadi.

 

Manba: “Hosilni saqlash va qayta ishlash” (Nabijon Hoshimov, “Dizayn-Press” MCHJ nashriyoti, Toshkent-2012) qoʻllanmasi.

 408 marta ko‘rilgan,  2 marta bugun ko‘rildi

Fikr bildirish

Email manzilingiz chop etilmaydi. Majburiy bandlar * bilan belgilangan

Ushbu sayt spamga qarshi kurashda Akismet’dan foydalanadi. Qoldirgan izohlaringiz qanday qayta ishlanishi bilmoqchi boʻlsangiz, shu havola orqali sahifaga oʻting.