Sholi nihollari qanday koʻchat qilinadi?

Sholini koʻchat qilish uchun koʻchatlarni maxsus maydonlarda yetishtirib olinadi. Ekishga tayyor boʻlgan koʻchatlarni koʻchat qilish uchun dastlab, koʻchat maydoni 3-4 soat oldin sugʻoriladi. Shunda yaxshi qondirib sugʻorilgan koʻchatlarni osongina koʻchirib olish mumkin.

Koʻchatlarni ekin dalasiga yaqinroq joylashgan kichikroq maydonda yetishtirilsa, koʻchirib oʻtkazish qulay boʻladi. Uzoq masofalarga esa traktor pritseplarida yoki maxsus mashinalarda olib boriladi. Koʻchatlarni ekishgacha salqinroq joyda 4-5 soatgacha saqlash mumkin.

Koʻchat qilish ishlarida ekin maydonining hajmiga qarab ishchi kuchi eng kamida 3-4 kishi boʻlishi kerak. Bunda bir kishi tayyorlangan yangi maydonni (pollarni) ketma-ket ravishda suv bilan toʻldirib tursa, yana bir kishi esa koʻchatlarni ekuvchilarga olib kelib berib turadi. Qolganlar esa koʻchatlarni muntazam ravishda ekishadi.

Bunda koʻchat oralaridagi masofa 10-12 sm dan 15-17 sm gacha boʻlishi mumkin. pollardagi suv sathi 5-10 sm boʻlsa ekish jarayoni qulay boʻladi. Koʻchat ildizi suv ostidagi loyga 3-4 sm chuqurlikda ekiladi. Nimjon va singan koʻchatlarni ekish yaramaydi. Bunda ular tutib ketgan taqdirda ham koʻp mehnat talab qiladi va rivojlanishdan ortda qoladi.

Koʻchat qilish jarayoni yozning eng issiq kunlariga toʻgʻri kelgani uchun suv doimiy yangilanib turishi kerak. Pollar ichidagi suvning isishiga yoʻl qoʻymaslik zarur. Buning uchun koʻchatlar ekib boʻlingandan soʻng, suvga biroz miqdorda karbamid (machovina) oʻgʻiti sepiladi. U suv isishini kamaytiradi.

Bunda koʻchatlarning eski barglari quriydi lekin, tana qismi qurimaydi va 3-4 kun oʻtib yangi ildizlar chiqara boshlaydi. 5-7 kun oʻtib esa, oʻzini tutib oladi va yangi barglar chiqara boshlaydi. Tez orada koʻchatlar oʻzini butunlay tiklab, faol oʻsa boshlaydi. Begona oʻtlar chiqqan hollarda 1-2 marta oʻtaladi.

 

Odiljon Yakubov tayyorladi.

 283 marta ko‘rilgan,  2 marta bugun ko‘rildi

Fikr bildirish

Email manzilingiz chop etilmaydi. Majburiy bandlar * bilan belgilangan

Ushbu sayt spamga qarshi kurashda Akismet’dan foydalanadi. Qoldirgan izohlaringiz qanday qayta ishlanishi bilmoqchi boʻlsangiz, shu havola orqali sahifaga oʻting.