Osh lavlagini toʻqsonbosti usulida yetishtirish

Osh lavlagining mahalliy Diyor, Yagona va xorijdan keltiriladigan navlaridan Bordo-237, Bikores, Boro F1, Detroyt, Pablo F1 duragaylari tavsiya etiladi. Ushbu navlardan gektaridan oʻrtacha 220-230 s hosil olinadi.

Lavlagi urugʻlari 4-5˚C haroratda unib chiqa boshlaydi, oʻsib-rivojlanib borishi uchun eng qulay harorat 20-25˚C dir. Lavlagi sovuq (-2-3˚C) va yuqori harorat taʼsiriga chidamli boʻladi, tuproqda nam yetarli darajada boʻlganda yuqori hosil beradi.

Toʻqsonbosti usulida ekish muddati janubiy viloyatlarida 15-30 dekabr, markaziy mintaqada joylashgan viloyatlarda 10-noyabrdan 10-dekabrga qadar va shimoliy mintaqalarda 1-noyabrdan 10-dekabrga qadar ekiladi. Urugʻ sarfi toʻqsonbosti usulida ekishda 16-8 kg. Ekish egatlari 60-70 sm boʻlib, 2-3 qatorli, oʻsimlik oralari 8-10 sm. Urugʻni ekish chuqurligi 2-3 sm.

Yerni shudgor qilishdan oldin gektariga 25-30 tonna chirigan goʻng, 320 kg ammofos, 180 kg kaliy-xlor oʻgʻiti solinadi. Bahorda vegetasiya davrida azot oʻgʻiti ikkiga boʻlib beriladi. Birinchi oziqlantirish oʻtoq qilib oʻsimlik siyraklashtirilgandan soʻng 240 kg karbamid yoki 550 kg sulfat ammoniy, ikkinchisi esa 3-4 chinbarg paydo boʻlganda yuqoridagi miqdorda solinadi. Ildizmeva shakllanishi davrida 10 l suvga 200 g karbamid solinib, bargidan purkash yoʻli bilan oziqlantiriladi.

Osh lavlagi oʻstirishda tuproqning cheklangan dala nam sigʻimiga nisbatan sugʻorishdan oldingi tuproq namligi 65-70% boʻlishi kerak.

Ildiz mevali sabzavotlar oʻsuv davrida suvni har xil miqdorda talab qiladi. Urugʻning unib chiqish, shuningdek, bargning jadal suratda oʻsishi va hosil toʻplash davrida ekinlarning suvga talabchanligi bir oz oshadi.

Sizot suvi chuqur joylashgan yerlarda osh lavlagi oʻsuv davrida 7-8 martagacha, sizot suvi yuza dalalarda esa 5-6 marta sugʻoriladi. Tuproq sharoitiga qarab gektariga 500-550 m3 hisobidan sugʻoriladi. Sabzini haddan tashqari katta meʼyor bilan sugʻorish tavsiya etilmaydi.

Oʻgʻitlarni berish muddati: Fosfor oʻgʻiti yillik miqdorining 75 foizini, kaliyning hammasi yerlarni asosiy ishlov davrida, qolgan 25% fosforni yerni boronalab egat olishda berish tavsiya etiladi. Azotli oʻgʻitlarning hammasi vegetatsiya davrida oziqlantirishda ikkiga boʻlib beriladi. Birinchi oziqlantirish oʻtoq qilib oʻsimlik soni siyraklashtirilgandan soʻng, ikkinchisi esa 2-3 tadan chin barg paydo boʻlganda oʻtkaziladi. Oʻgʻitlar oʻgʻitlagich moslamalar bilan qator oralariga oʻsimlikka yaqinroq qilib beriladi.

Kasallik va zararkunandalarga qarshi kurash. Shira, lavlagi uzunburun zararkunandalariga qarshi kurashda 1 gektar ekin maydoniga preparatlardan 20 foizli Konfidor em. k. (150-250 ml) yoki Maspilan (150-250 ml) yoki 57 foizli Fufanon (80-100 ml) preparatlarini 600 litr suvga aralashtirib purkash tavsiya qilinadi.

Vegetatsiya davri: 80-100 kun.

Hosil pishish davri: Aprel – may.

 

Manba: agro.uz sayti.

 449 marta ko‘rilgan,  2 marta bugun ko‘rildi

Fikr bildirish

Email manzilingiz chop etilmaydi. Majburiy bandlar * bilan belgilangan

Ushbu sayt spamga qarshi kurashda Akismet’dan foydalanadi. Qoldirgan izohlaringiz qanday qayta ishlanishi bilmoqchi boʻlsangiz, shu havola orqali sahifaga oʻting.